成龍 央視 大談國慶閱兵

隔牆有耳：成龍又亂噏　央視主持 O嘴
2009年10月07日

藝人成龍繼早前發表「中國人是需要管的」奴才論之後，先幾日上中央電視台講中共建政 60年，又胡言亂語。十．一佢有份出席閱兵慶典，仲坐第一排，可能因為咁，佢喺節目上手舞足蹈得意忘形，連胡錦濤都攞嚟講笑。佢話見到胡主席，想衝過去握手，但知道手未伸出去，就「蹦、蹦、蹦」（意即開槍聲），嚇到主持即刻補鑊話「不會的」。
聲言連個天都幫中國

成龍越講越 High，話中國五千年嚟未好過，鶽家就乜嘢都好，連天都幫中國，閱兵當日藍天白雲。搞到主持人都唔好意思，話畀佢知當日係發射咗 400幾支氣象火箭，先至咁好天氣。

成龍講到興起，一時唔記得自己老婆林鳳嬌一早去咗美國住，個仔房祖名都喺美國出世，大鬧 97年移民嘅香港人，話呢班人走咗就唔係中國人，鶽家又自動走返嚟，又話「中國籍是全世界最難進的籍」，其他國家畀錢就可以入籍，中國就畀錢都入唔到。佢老哥咁落力，到建政 70年重拍《建國大業》，唔知有冇機會扮演毛澤東呢？